#ThalapathyVijay   #Master

తమిళ నటుడు విజయ్‌ కథానాయకుడిగా లోకేశ్‌ కనకరాజ్‌ దర్శకత్వంలో తెరకెక్కిన చిత్రం ‘మాస్టర్‌’. సంక్రాంతి కానుకగా విడుదలైన ఈ సినిమా ఆయన అభిమానులను విశేషంగా ఆకట్టుకుంది. కథానాయకుడిగా విజయ్‌, ప్రతినాయకుడిగా విజయ్‌ సేతుపతిలు పోటాపోటీగా నటించారు. కాగా, జనవరి 29వ తేదీ నుంచి ఈ చిత్రం అమెజాన్‌ ప్రైమ్‌ వేదికగా స్ట్రీమింగ్ కానుంది. ఈ విషయాన్ని అమెజాన్‌ ప్రైమ్‌ వీడియో తాజాగా వెల్లడించింది. ఈ మేరకు ప్రకటన విడుదల చేసింది.

విజయ్‌ నటించిన మాస్టర్‌ చిత్రాన్ని తమ ఓటీటీలో విడుదల చేయడం ఆనందంగా ఉందని అమెజాన్‌ ప్రైమ్‌ వీడియో ఇండియా హెడ్‌ విజయ్‌ సుబ్రమణియమ్‌ తెలిపారు. అభిమానులు, ప్రేక్షకులు ఈ ఏడాది ఎంతో ఆసక్తిగా ఎదురు చూస్తున్న చిత్రాల్లో ‘మాస్టర్‌’ ఒకటని, అలాంటి చిత్రాన్ని ప్రైమ్‌ చందాదారుల కోసం తీసుకురావడం సంతోషంగా ఉందని అన్నారు. జాన్‌-భవానీల మధ్య పోరును థియేటర్‌లలో చూసి ఎంజాయ్‌ చేసిన అభిమానులు ఇప్పుడు అమెజాన్‌ ప్రైమ్‌ వీడియో ద్వారా మరోసారి ఈ యాక్షన్‌ డ్రామాను చూసి ఆస్వాదిస్తారని నటుడు విజయ్‌ అన్నారు. ప్రైమ్‌ ద్వారా ప్రపంచవ్యాప్తంగా ఉన్న విజయ్‌ అభిమానులకు ఈ చిత్రం మరింత చేరువ అవుతుందని దర్శకుడు లోకేశ్‌ కనకరాజ్‌ సంతోషం వ్యక్తం చేశారు.