వాల్డ్ డిస్ని నుంచి వచ్చిన యానిమేటెడ్ సినిమా ప్రొజెన్ కు ప్రపంచవ్యాప్తంగా ఉన్న ఆదరణ అంతా ఇంతా కాదు. 2013 లో వచ్చిన ఈ సినిమా ప్రపంచవ్యాప్తంగా 1.3 బిలియన్ డాలర్లు రాబట్టింది. ఆ ఏడాది ఉత్తమ యానిమేటెడ్ సినిమాగా ఆస్కార్ పురస్కారాన్ని గెలుచుకుంది. ఇప్పుడు ఈ సినిమాకి కొనసాగింపుగా ఫ్రోజెన్ 2 ని తీసుకొచ్చింది డిస్నీ సంస్థ.

ఇందులో ప్రధాన పాత్రలైన యువ రాణి ఎల్సాకు ప్రముఖ నటి నిత్యామీనన్ డబ్బింగ్ చెప్పగా....చిన్నారి ఎల్సా పాత్రకు మహేష్ కూతురు సితార గాత్రదానం చేసింది. హాస్యనటుడు ప్రియదర్శి మంచు మనిషి ఓలఫ్ కు డబ్బింగ్ చెప్పారు. ఈ సినిమా తెలుగు, తమిళ, హిందీ భాషల్లో ఈనెల 22న ప్రేక్షకుల ముందుకు రాబోతుంది.

ఈ సందర్భంగా శనివారం హైదరాబాద్ లో తెలుగు ట్రైలర్ విడుదల చేశారు. ఈ సందర్భంగా నిత్యామీనన్ మాట్లాడుతూ.... 'నిజానికి డబ్బింగ్ చెప్పడం నాకు ఇష్టం లేదు. యానిమేటెడ్ సినిమాలు పెద్దగా చూడను. కానీ ఈ సినిమా కోసం డిస్ని వాళ్ళు నన్ను అడిగినప్పుడు నేను వెంటనే ఓకే చెప్పను. ఎందుకంటే నాకు ఫ్రోజెన్ చాలా ఇష్టం.

అందులోని ఎల్సా నాకు బాగా గుర్తుంది. పిల్లలకు చాలా ఇష్టమైన బలమైన పాత్ర ఇది. తొలిభాగం వచ్చినప్పుడు నా స్నేహితురాలు చెప్తే వెళ్లి ఆ సినిమా చూశా. అప్పుడే చాలా బాగా నచ్చేసింది. ఈ పాత్రకు నాకు కొన్ని పోలికలు ఉన్నాయి. అవి ఏంటనేది కచ్చితంగా చెప్పలేను. ఇలా ఓ యానిమేటెడ్ పాత్రకు డబ్బింగ్ చెప్పడం చాలా కొత్తగా అనిపించింది' అని అన్నారు.

నమ్రత మాట్లాడుతూ.... 'తొలిసారి సితార డబ్బింగ్ చెబుతున్నప్పుడు ఓ తల్లిగా ఎంతో సంతోషించాను. అంతేకాక కాస్త భయపాడ్డాను. ఎల్సాకి సితార చక్కగా డబ్బింగ్ చెప్పింది. దీనికోసం తాను ప్రత్యేకంగా ఎటువంటి శిక్షణ తీసుకోలేదు. తన డాన్స్ టీచర్ కొన్ని సలహాలు, సూచనలు ఇచ్చింది. సీతారాకు ఎల్సా పాత్రంటే చాలా ఇష్టం. ఆ పాత్రకు ఇప్పుడు తానె డబ్బింగ్ చెప్పడం ద్వారా తన కల నిజమైనట్లు అయ్యింది' అని అన్నారు.

సితార మాట్లాడుతూ.... చిన్నారి ఎల్సాకు డబ్బింగ్‌ చెప్పడాన్ని చాలా ఎంజాయ్‌ చేశా. ఈ సినిమా చేస్తున్నట్లు నాన్నకు చెప్పినప్పుడు సర్‌ప్రైజ్‌గా ఫీలయ్యాను అని చెప్పింది.